خطاب تيار المستقبل
المطالبة بالتّحقيق الدّولي
مع اللحظات الأولى للإنفجار سارع تيار المستقبل إلى المطالبة بتحقيق دولي ، معتبرًا أنّ حدثًا بهذه الضخامة يستدعي جهة محايدة للتحقيق .
هذا الأمر الذي جرى البارحة كان أيضاً عملاً كبيراً ارتكب بحق اللبنانيين ولا يجوز بالنهاية أن يصار الى معالجته كأنه جريمة عادية حادث سيارة وبالتالي خلي القضاء اللبناني يحقق فيها بالشكل الذي نعهده
هذا الأمر حماية لأمن اللبنايين يجب أن يكون هذا التحقيق بيد جهة حيادية لديها صدقيتها وبالتالي حتى نحن اقترحنا اما لجنة دولية يعينها مجلس الأمن وإما لجنة عربية
06/08/2020
المطالبة بتحقيق دولي ، موقف إلتزم به تيار المستقبل دائمًا .
– أولاً نحن طلبنا بتحقيق دولي للمرفأ تما ينحرف هيدا الموضوع خليني قول صراحة مش نحن يلي ما جبنا تحقيق دولي الدول يلي حكينا معها بهيدا الموضوع رفضت تحقيق دولي يمكن ما حدا بيعرف انا عم قولها لأول مرة
-مين الدول وليه ؟
كل الدول يلي حكيناها بموضوع التحقيق الدولي رفضت وعم تصر على هيدا الموضوع
-فرنسا ضمنن ؟
كلّن رفضوا.
22/07/2021
أنا اليوم جايي قدملكم الحل الوحيد لنوصل للحقيقة طالما التحقيق الدولي ما بدن يمشوا فيه مع انو نحن بعدنا مصرين وحنكمل شغل على التحقيق الدولي.
27/07/2021
رفع المسؤولية أو رفع الغطاء ؟
وقد سارع تيار المستقبل إلى الإعلان عن رفع الغطاء عن أيّ مقصَر يثبت تورّطة في حال نتماءه للتيار .
نحن اذا أي حدا اذا هناك أي مقصَر من تيار المستقبل لا غطاء عليه بسهولة يعني اذا هناك أي أحد يظهره التحقيق مقصراً من المسؤولين بالدولة.
10/08/2020
ولكن تيار المستقبل رفع المسؤولية عن رئيسه ورئيس الحكومة السابق سعد الحريري عن أيّة مسؤولية تترتب عليه ، حيث أعلن الحريري (الذي قام بزيارة المرفأ سابقا) بأنه لم يعلم بوجود النيترات ، فيما أشار أمين عام التيار أحمد الحريري أنه لو هناك وثيقة تثبت علم الحريري بالنيترات لكن "الحاقدين" قد كشفوا عنها "
لأنو انا ما عندي خبر انا ما بدي اتهم حدا بس انا تجوا تحملوني مسؤولية انا ما بعرفا لا حبيبي انا بس لما كون مسؤول بقول انا مسؤول انا ما بخاف من المسؤولية واذا كنت انا عامل اهمال لازم اتحاسب عليه حاج بقا نتخبى ورا اصابيعنا مين بالبور ؟ في جيش في أمن عام في أمن دولة وفي رئيس لهالبور وين الجيش من هالمسؤولية ؟ وين قوى الأمن العام من هالمسؤولية وين الأمن الدولة حبيبي أنا يلي عم بعمل التحقيق لو أنا رئيس حكومة كنت جبتن كلن.
9/10/2020
لم تأتي مراسلة للرئيس سعد الحريري وعفكرة لو آتية المراسلة كانت تسربت سريعاً ما تخافي الفريق العقل الحاقد القابع مع حسان دياب كان سرَب الرسالة لو جايي للرئيس سعد الحريري أو للرئيس تمام سلام من ال 2014 لليوم أبلغ شفهياً الرئيس دياب بشهر 4 رجع أبلغ خطياً بنصف شهر 6 رجع أبلغ خطياً ب 20/7 متل ما حكينا وهذه النسخ تبع شهر 6 وشهر 7 أبلغ فيها الرئيس عون كذلك ولم يتحرّكا بهيدا الاطار فمن هيدا المنطلق نحن آخرة النهار اليوم في كارثة وقعت اليوم تحوّلت الى المجلس العدلي ولكن نحن كفريق سياسي شو بدك أكتر من انو بدنا نطالب بتحقيق دولي ل يلي حصل.
10/08/2020
على مستوى توزيع المسؤوليات إعتبر الحريري أنها تتوزع على الأجهزة والإدارات العاملة على المرفأ ، مطالبًا بتحييد الطائفية في مقاربة المسؤوليات ، وبتتبع المال لفهم ما جرى !
بس لما نجي نحكي بموضوع ما نحكيه بمبدأ طائفي لأنو هلأ بيجوا بقولوا عم يدق بالجيش لا ما عم دق بالجيش عم دق بالمسؤولين عن هيدا الموقع مين ما كان يكون هلأ طلع معنا انو عبد الحفيظ يلي هوي مدير عام بالنقل وقريطم هني المسؤولين مش هيك ؟
وبدري ضاهر
وبدري ضاهر والجمرك حقاً نسيت انو الجمرك. مين عندو مسؤولية مباشرة مين فوّت هيدي الباخرة مين اللي خلا هيدا. أنا بالنسبة لإلي FOLLOW THE MONEY
مرسيل: بنلحق المصاري
عكل حال كل الجرايم بتنلقط بس لما تشوف وين المصريات راحوا
مرسيل: لكن في حفلة قرط عملة تحت عالبور
يمكن ما بعرف
09/10/2020
عندي سؤال قبل الانفجار كل الحكي كان بالبور انو التهريب فايت وطالع من البور وتهريب وانو البور عم يخسر مئات الملايين ووووو…. طب هلأ مش وقت انو نعرف كمان انو هيدا الحكي مزبوط ولا لأ ؟
09/10/2020
وهنا لم يتردد رئيس تيار المستقبل الذي كان يطالب بتحقيق دولي، من الإعلان عن ثقته بالتحقيق المحلي الذي يحظى بدعم تقني من الخارج .
– طب هلأ في تحقيق من قبل الدولة
مرسيل: بتوثق فيه ؟
أنا بوثق بالقاضي العدلي وبوثق انو نعم في أجهزة عم تقوم بشغلها وبوثق انو كمان في مساعدات عم تنعطى من أجهزة من دول ان كان الفرنساوي ولا الالماني بتقلّي بدك تحقيق دولي يا ريت فيني أحصل على تحقيق دولي.
09/10/2020
تعليق الحصانات
ولكن تحولا طرأ على خطاب تيار المستقبل ، لا سيما بعد ملاحقة المحقق العدلي للوزراء ورئيس الوزراء السابق حسان دياب مع ما يمثله هذا المركز من رمزية طائفيه ، إذ أنّ عددًا من نواب التيار كانوا من بين الذين وقّعوا على العريضة التي طالب بمحاكمة رئيس الحكومة والوزراء حصرًا أمام المجلس الأعلى لمحاكمة الرؤساء والوزراء في ملف المرفأ ، وهو ما دفع عدد من الناشطين الى إطلاق صفة نواب النيترات على أولئك الذي وقّعوا على هذه العريضة . هذا الأمر دفع سعد الحريري إلى الدفاع عن تياره معلنًا أنّ المشكلة لا تكمن في تياره بل في النصوص القانونية والدستورية التي تعطي حصانة للقضاة والوزراء والرؤساء والموظفين .
لما في دستور بقول انو رئيس الجمهورية عليه حصانة وما بيتحاكم اذا أهمل مش سعد الحريري يلي حط النص الدستوري ولما في دستور بقول انو رئيس الحكومة والوزراء بيتحاكموا اذا أخلوا بواجباتن أمام المجلس الأعلى مش سعد الحريري يلي حطو لهيدا النص ولما في دستور بقول ما فيك تحاكم النائب بأي جرم جزائي بدون ما ترفع عنو الحصانة كمان مش سعد الحريري يلي حط هيدا النص ولا كتلة المستقبل هيي يلي حطت هيدي النصوص ولما في قانون بقول انو القضاة ما فيك تحاكمن أمام المحقق العدلي ولا أمام المجلس العدلي وبدك تحوّلن على محكمة خاصة كمان مش سعد الحريري يلي حطو لهيدا النص ولما في قانون بقول ممنوع تدعي على موظف الا ما تاخد اذن رؤساءه ولما فيه قانون بقول ممنوع تدعي على محامي الا ما تاخد اذن من مجلس نقابتو مش سعد الحريري يلي حط هيدي النصوص.
27/07/2021
وتلافيا لانتهاء تحقيق المرفأ أمام ثلاث محاكم ، خرج تيار المستقبل باقتراح يطالب بتعليق المواد الدستورية القانونية التي تعطي حصانات لأيٍّ كان في ملف المرفأ
بس يلي لازم تعرفوه انو هيدي القضية اذا بدها تبقى متل ما هيي ماشية اليوم وفقاً للقانون والدستور رح تصير هيدي القضية أمام 3 محاكم نعم 3 محاكم المجلس الأعلى لمحاكمة الرؤساء والوزراء المجلس العدلي محكمة التمييز الخاصة بالقضاة يعني بكرا تصوّروا كل واحد بيطلع يعني واحد بقول ارهاب واحد بقول اهمال واحد ما بعرف شو بقول فهل يجوز هيدا الأمر ؟ وعم بحكي قدام الرأي العام هل يجوز انو قضية تحكم فيها 3 محاكم ويطلع فيها 3 أحكام ؟ أنا بقلكن لأ وألف لأ منشان هيك قررت اليوم انا وكتلة المستقبل نحط العالم كلها امام مسؤولياتها وضميرها واخلاقها ويلي بدو الحقيقة بدون مزايدات يتفضل يمشي معنا بإقتراحنا لما الدول تمرق بأزمات كبرى ولما الدول بصير فيها جريمة بحجم جريمة مرفا بيروت يلي تم تصنيفها تالت أكبر انفجار بالتاريخ على الدول وعلى القوى السياسية فيها انو تاخد القرارات قرارات استثنائية بحجم الجريمة والقرار الاستثنائي يلي لازم ناخدو ويلي اخدناه اليوم هوي اقتراح اسمعوني منيح تعليق كل المواد الدستورية والقانونية يلي بتعطي حصانة أو أصول خاصة بالمحاكمات لرئيس الجمهورية ولرئيس الحكومة والوزراء والنواب والقضاة والموظفين وحتى المحامين.
27/07/2021
إقتراح تيار المستقبل كان عمليًا يضع حصانة رئيس الحكومة مقابل حصانة رئيس الجمهورية المنصوص عنها صراحة في الدستور ، وهو بذلك اشترط رفع الحصانة عن رئيس الجمهورية مقابل محاكمة رئيس الحكومة أمام المجلس العدلي . ولا عجب أن إقتراح تيار المستقبل بقي حبرًا على ورق ولم يسلك طريقه غلى التشريع .
ويلي طالب من أول يوم بتحقيق دولي لتسقط الحصانات عن كل المتهمين ما بيطلع بآخرة النهار متّهم بحماية المرتكبين لازم الكل يعرف ما في كبير قدام الحقيقة.
27/07/2021
تفجير المرفأ وتفجيرات إيران
"ما في كبير قدام الحقيقة"، شعار رفعه رئيس تيار المستقبل ولكن بدا كما لو أن التيار يبحث عن حقيقة تخدم أجندته ، فها هو أمين عام تيار المستقبل يعتبران انفجار المرفأ لا يخرج عن سياق الإنفجارات التي حدثت في إيران .
التفجير انا ما بفصلو عن التفجيرات يلي صارت بإيران الوهمية يلي ما عرفنا بلش حريق صار انفجار بلش حريق صار انفجار فوق الستين انفجار هيك.
22/07/2021
أولاً مين جاب النيترات بدنا جواب من القاضي اذا صار بيعرف مين جابن مين ورا الشركة الوهمية يلي جابتن كمان هيدا سؤال كبير مين ورا الشركة الوهمية يلي هون يلي طلبت النيترات هوي عم بقول صاروا واضحين هودي عندو هول الأساس مش أساس هوديك كمالة أو غير اذا بدنا يعني ناخدا انو بس اهمال مش عمل ارهابي اذا عم نواجه هيدا الشي موضوع آخر.
22/07/2021
تحميل المسؤولية للقضاء
خليني اسأل سؤال واحد اذا تم اتهام كل هالوزراء اجاهم حقهم لأهالي الضحايا ولا اللي فوت النيترات واللي فجر النيترات هول مش مهمين هول أبداً مش مهمين ليش القضاة حطوا هيدا كلو مش مهم أما هول مهمين أهملوا اوك بس مين فجر مين جاب مين دفع المصاري مين خلاها للباخرة قصداً تقعد كل هالوقت بأمر قضائي بأمر قضائي أتخن رئيس وزراء ولا رئيس جمهورية ولا ايا وزير ما في يعمل شي قدام أمر قضائي بتعرفوا هالشي لا ما بتعرفوا هالشي بس هيدي حقيقة يعني بكرا اذا بيطلع أمر قضائي بأي شي ما دخلو بالبور أي وزير خلص تكبّل ما عاد فيك تعمل شي لحتى تروح تستأنف وهيدا كلو صار BY THE WAY كل هيدي الأمور صارت واستأنفوا مرة وتنين وتلاتة وخمسة بالقضاء والقضاء ما عمل شي لأنو مطلوب انو هيدي الباخرة تبقى.
27/07/2021
وفي تصريح بالغ الدلالة ، لجهة تحديد الأولويات بالنسبة لتيار المستقبل في تيار المستقبل ، اعتبر أحمد الحريري أنّ المجلس العدلي ليس معنيًّا بقضايا الإهمال والفساد بل التفتيش المركزي !
بموضوع المجلس العدلي خلينا ناخد شو اختصاصو اختصاصو المواضيع يلي بتمس الأمن القومي تبع البلد والارهاب اليوم اذا هيي مسألة تقصير واهمال وغيرو التفتيش المركزي بروح بيعملها مش القاضي العدلي بدو يجاوبني على هودي الأسئلة هول الأساس لأنو هول الأداة الجرمية الرئيسية يلي أدت للإنفجار اذا ما عرفنا هول مين جابن وكيف اجوا وشو صاروا ولوين راحوا بنكون عم نتطلع على جهة مقصرة لازم تاكل عقابها مين ما كانت تكون بس الجوهر تبع المشكل بكون مخفي.
22/07/2021
شاركنا رأيك!